कर्नरिङको आरोप खेप्ने ५८ नम्बर ब्रोकरबाट अनलाइन लिन मरिहत्ते, सबैलाई टप्यो !

काठमाण्डौ । बेला–बेला सेयर कर्नरिङ र चलखेलको आरोप खेप्दै आएको ५८ नम्बर ब्रोकर(नाशा सेक्युरिटिज)बाट अनलाइन सेयर कारोबारको यूजर नेम र पासवर्ड लिनेहरु ह्वात्तै बढेका छन् । 

नेपाल स्टक एक्सचेञ्ज लिमीटेड(नेप्से)ले शुक्रबार सार्वजनिक गरेको २०२१, मार्च ४ सम्मको अनलाइन कारोबार गर्नेहरुको ताजा विवरणमा यस्तो देखिएको हो । 

लगानीकर्ताहरुलाई विभिन्न कम्पनीको सेयर किन्न सुझाव दिने र कतिपय कम्पनीको विषयमा त रिटर्नको ग्यारेण्टी समेत गर्ने भनी ५८ नम्बर ब्रोकरको विषयमा बजारमा हल्ला फैलिएपछि लगानीकर्ता सोही ब्रोकरतर्फ आकर्षित देखिएका हुन् । 

हालसम्म नेपालमा अनलाइन कारोबार प्रणालीको यूजर नेम र पासवर्ड लिने लगानीकर्ताको संख्या ४ लाख ४५ हजार ३५३ पुगेको छ । यसमध्ये सबैभन्दा बढी नाशा सेक्युरिटिजबाट ४१ हजार ९०२ जनाले अनलाइन यूजर नेम र पासवर्ड लिएका छन् । यो ब्रोकरबाट अनलाइन लिनेमध्ये २१ हजार १८५ लगानीकर्ता सक्रिय रुपमा दोश्रो बजारमा संलग्न रहेका तथ्याङ्कले देखाएको छ । 

यस्तै, ब्रोकर नम्बर ३२ सनि सेक्युरिटिजबाट समेत २७ हजार ६६९ ले अनलाइन लिएका छन्, तीमध्ये १४ हजार ७६ जना सक्रिय लगानीकर्ता हुन् । 
मिदास स्टक ब्रोकिङ कम्पनी अर्थात ब्रोकर नम्बर २१ बाट २० हजार ५०३ ले अनलाइन लिएका छन् । यीमध्ये ९ हजार २३८ सक्रिय छन् । 

ब्रोकर नम्बर ५७ आर्यताराले १९ हजार ८१५, इम्पेरियल सेक्युरिटिजले १९ हजार २८, ब्रोकर नम्बर ३४ भिजन सेक्युरिटिजले १८ हजार ९१४, ब्रोकर नम्बर ३८ दीपशिखाले १८ हजार ७७९, ब्रोकर नम्बर ४९ अनलाइन सेक्युरिटिजले १८ हजार ५५० जनालाई अनलाइन यूजर र पासवर्ड वितरण गरेका देखिएको छ । 

सबैभन्दा कम ब्रोकर नम्बर १८ सगरमाथा सेक्युरिटिजले हालसम्म पनि ७७९ जनालाई मात्र अनलाइन यूजर नेम र पासवर्ड दिएको छ । तीमध्ये पनि ३८७ लगानीकर्ता मात्रै सक्रिय छन् । 

मार्च ४, २०२१ सम्म कुन ब्रोकरले कति अनलाइन यूजर नेम र पासवर्ड बाँडे ? तीमध्ये कति सक्रिय छन् ? ब्रोकरहरुको कुल ग्राहक संख्या कति छ ? हेरौं: